近年港人好鍾意行山，但長年累月下令行山徑加速耗損，漁農自然護理署為此舉辦工作坊，招募行山人士當義工，幫手復修耗損路段，去年底至今已經喺大帽山同雞公山嘅麥理浩徑舉辦咗5次山徑維修工作坊，通過樂施會、綠惜地球等環保團體招募咗約100名義工參與。
就地取材搬石挖水道
熱愛行山嘅張小姐（圖）係參加者之一，佢接受《政府新聞網》訪問時話見郊野嘅山徑清潔又整齊，對修橋補路工作極好奇，所以參加工作坊，佢同廿幾名義工去近大帽山頂一段麥理浩徑，喺漁護署職員指導下，用附近嘅泥土、石塊等將分岔路整合為主路，「真係好辛苦，呢段路凹凸不平，我哋要挖排水道，疏導積水」。
漁護署郊野公園主任洪敦熹話大帽山上石塊較多，係維修路徑嘅好材料，石塊亦可以用嚟堵截支路，引導行山人士使用主路。原來漁護署更會邀請海外專家向義工講解維修技巧，該署計劃秋季再推出同類工作坊，等有興趣嘅市民一齊保育大自然。