前晚同幾個搭飛機多過我食飯嘅朋友聚會，一嚟就插UA。律師話：「畀我就會同佢哋講：一，班機冇oversold，嗰四條友唔係客，係機組人員；二，就算oversold，你哋嘅contract係講denied boarding，按程序，只可以因為超賣而唔畀我登機，但我登咗機，你就冇權趕我落機。」
我問：「嗰四個人有任務，UA唔可以話有緊急事故要你讓座咩？」律師先問候一句UA嘅娘親，然後解釋：「合約係有refusal of transport，但呢個case唔適用。比如你破壞秩序，去裸跑，咁係可以踢你條粉腸落機，但家陣係UA想趕佢走，先搞出場大龍鳳吖嘛，點可以倒果為因？UA亦有權喺force majeure嘅情況下拒載，即係啲控制唔到嘅事，例如天氣、打仗、核爆之類，但有咩？所以我結論係：UA毀約。下次畀人趕落機，記住我講嘅嘢，咪以為『係咁㗎啦』，係你個死人頭！」
律師講完，到高級行政人員分享：「我讀書少，但明白航空公司做任何嘢，都只有一個目的：賺盡。佢DB個客，最理想嘅後果，就係冇後果。講個故事：我係XX嘅member，可以預先劃位，但有次收通知，話個位要改，咁我即刻明啦，實係有個更高級別嘅member同我搶。輸在起跑線，就要贏在電話線，我即刻打去投訴，話自己成家人飛，扶老攜幼，你換我位我老母點算？佢哋初頭唔理，我就打足三日，次次鬧半個鐘，直到佢哋發現郁我嘅代價太高，終於跪低，而從此我亦冇再畀佢哋搞過。歐陽鋒話，唔想畀人拒絕，最好嘅辦法係先拒絕人，所以如果你唔想畀航空公司搞，最好嘅辦法就係搞咗佢先。其實係人都可以好西，只要你明白航空公司比你更西！」