呢一代講車神，第一時間一定諗起Sarah李慧詩，尤其佢喺13年世錦賽攞彩虹戰衣，成為「牛下女車神」。不過講歷代車神喇喎，80年代有洪松蔭，曾經代表香港出戰奧運單車公路賽。到94年沈金康教練入主港隊，之後出過四件彩虹戰衣。
仲記唔記得07年洪松蔭做評述員，走音勁過靚聲王咁大嗌：「彩虹戰衣，世界冠軍，第一個成為世界冠軍嘅香港人。」呢一句就係講緊黃金寶當年喺世錦賽，捕捉賽為香港首奪彩虹戰衣，堅勁揪！除咗做世界冠軍，阿寶仲係三屆亞運公路賽冠軍。
另外兩件彩虹戰衣，分別係郭灝霆11年嘅世錦賽男子捕捉賽，同阿寶同一項目再次贏得彩虹戰衣。同年仲有世青冠軍梁峻榮，贏得香港歷來第一件世青男子記分賽彩虹戰衣。早前喺亞錦賽先贏完捕捉賽金牌嘅佢，可以話係香港單車希望之一。