好勇鬥狠呢樣嘢，真係特首梁振英嘅天性，吓吓都要反擊人，唔開火都唔安樂咁，譬如佢近日明明離港放緊復活節假，都要喺網誌撰文向泛民開拖，針對資訊科技界立法會議員莫乃光喺港台節目《香港家書》，提到香港嘅「智慧城市」發展落後於新加坡而大動肝火，點名駁斥，但莫乃光都唔好惹，其後喺facebook反駁對方，兩男喺復活節刀來劍往，一啲都唔平安噃。
莫乃光日前喺《香港家書》話香港嘅「智慧城市」發展落後，源於梁振英喺2015年嘅施政報告先提出相關發展，雖然「遲到好過冇到」，但至今如東九龍「智慧城市」等項目仍然未有實際進展，泊車系統最近先接受信用卡付款等，遠較其他國家落後，批評政府冇採納新科技及應用等，又讚賞新加坡政府對科技好支持，希望新特首加速推動香港發展成為「智慧城市」。
趁機鬧拉布阻發展
唔知係咪踩中新加坡優勢多過香港呢個死穴？梁振英隨後喺fb開火，點名指摘莫乃光冇協助推廣創科時，仲趁機炮轟反對派拉布。佢話呢屆政府5年前就提出成立創新及科技局，「因為兩次被立法會反對派議員拉布拉死，延誤了三年。特區政府每次向立法會申請撥款，又被立法會反對派議員拉得沒完沒了」。
佢話明不滿莫乃光羡慕新加坡發展：「新加坡有拉布的議員嗎？……莫乃光議員願意給予特區政府類似新加坡政府的權力嗎？」呼籲市民check check立法會會議紀錄，睇下「反對派議員」對創科有幾關心喎！
嘩！躺着也中槍，莫乃光不得不喺放假期間反擊，佢其後喺fb上載梁特fb截圖，反擊指對方冇認真睇佢嘅建議，而係「慣性政治化搞分化」，更大讚新加坡政府會檢討自己不足，但梁振英從未聽過佢哋嘅意見，寸爆話：「你唔識，只識開局，我不期望你明，只希望下手唔好學你，肯真心聆聽。」
李八方