【本報訊】眼前的梁梓敦，一貫全黑。「做我哋呢行，都有dress code」，他服務的聖匠堂在紅磡傳統老區，也是最近殯儀館的社會機構，「死亡從來都唔遙遠，有時甚至好似電影情節，話死就死」。急病、意外、自殺，陪伴喪親者出入殮房、聆聽哀痛，他是喪親輔導服務「護慰天使」計劃的推手，又積極在港以創意方式推動生死教育。10年間見證700生死，但他直言，經驗再豐富都好，當摯愛的母親離世，仍一度手足無措，「生死教育，是上不完的課」。注視死亡，為走出哀傷，他說更為要好好活着。
記者：呂麗嬋
這天，梁梓敦走進護老院主持講座，「老友記今日講殯儀講死，你哋驚唔驚？」這樣的開場白，原為「定驚」，那知眼前銀髮長者猛說「聽到厭」。講座完閒談，提起「有冇交低後事畀啲仔女」，老人家的答案同樣叫他驚訝：「我一講佢哋就鬧，唔畀我講，話做咩講埋啲咁嘅嘢。」梁慨嘆：「老人院嘅經驗令我反思：原來最需要認識死亡嘅，係佢哋啲仔女。」港大的研究就發現，老人家最能預備死亡，反而越後生恐懼越大、越不想面對。
咖啡拉花吸引青年談生死
對症下藥，但一講生死，就是沉重。「嗰時嘅構思，係想搞一啲活動，年輕人同成年人都覺得吸引」，咖啡拉花論生死、沙灘堆沙反思死亡，借題發揮的「暗黑」工作坊，只為搞搞新意思，卻竟引起好奇，爆冷受歡迎，獲邀在電台開咪講生死，又舉辦名為DEAtHFEST的「死亡節」，甚至獲額外資源，邀請獨立記者陳曉蕾撰寫《死在香港》一書，讓生死教育更貼地，「希望係一粒種子，讓年輕人反思死亡，活好當下」。
2007年社工系碩士畢業，1981年出生的梁梓敦，入職時才26歲，人生之中未經歷過死別，「嗰時只知份工要出入殮房同火葬場，第一次送嘅，係一個孤苦無依嘅伯伯」。礙於人生閱歷，試過碰壁。「有次主持講座提到遺體，為咗形象化，我形容好似街市雪凍咗嘅雞，硬硬哋……事後有義工鬧我，話咁講好唔尊重先人」。從錯誤中學習，直至遇上中學女生因交通意外死亡，令他深受觸動，看到服務的意義。
「喺公眾殮房，個爸爸望住女兒遺體，一句說話都冇講，只望咗半分鐘之後輕輕說一句：乜撞到咁……」沉重的畫面，白頭人送黑頭人的痛，既感震撼亦很無力。「唯一可以做係搭佢膊頭……原來人面對極端哀傷，最需要嘅係陪伴」。他說：「你心底知道，冇一句說話可以令佢唔傷心，但至少，唔好令不幸嘅朋友一個人去面對。」都說生老病死無可避免，2009年向來健康的媽媽證實患上末期癌症，曾經遙遠的死亡，一夜間近在咫尺。
「情況惡化得好快，嗰時媽媽已經卧床，返到屋企，好唔想面對，一返屋企就入房，因為見到媽咪瞓喺度，個心好辛苦，逃避咗幾個月……個人好割裂，返工安慰喪親嘅朋友，但返到屋企，有一個臨終嘅病人，又不願去面對……」心底知道，只有承認親人將死的事實，才可以把握有限時間，但知易卻行難，「如果唔跨過呢一步，可能就只留下遺憾同內疚」。鼓起勇氣，行入媽媽的房間，他第一時間想到的，是說對不起，「作為獨子，必然有做令佢擔心嘅事」。
「節哀順變唔講好過講」
只一年，媽媽撒手人寰，至今仍然思念，卻再無遺憾，「想講嘅已經講咗，媽媽離開係改變唔到嘅事實，係我嘅工作教識我點樣面對」。經歷過喪親之痛，他說更能感同身受，「千祈唔好講人都死咗， 唔好再諗」。失去親人，一句「節哀順變」，他謂是「唔講好過講」，「就如冇人比臨終病人更清楚自己嘅病情，你同佢講：唔好諗咁多，一定會好番，其實係多餘」。一室好陽光，想做甚麼就去做，無必要隱瞞，將焦點放在今日就好。
「死亡從來都唔遙遠，有時甚至好似電影情節，話死就死」，10年間見證700生死，由BB到成年人到長者；由長期病患、急病、意外，到自殺甚至被殺，「生命嘅意義，不在於等待死亡，而是活好當下，有說話想講就要快講，要講對唔住就快講」。都說人在出生第一天就在倒數生命，看似悲觀，但梁梓敦卻說，是從死看生的過程，「放下執着，活好今天就好」。遍歷生死仍只是36歲的他說。
