話阿仙奴領隊雲格係精明眼又好，算死草又好，「教授」堅持量入為出嘅態度仲強硬過香港財爺，就好似23歲波斯尼亞左閘哥拉辛拿斯勢成球隊今夏首簽，自由身唔使轉會費呢點應該好大吸引力。同一道理，明年夏天約滿嘅兩大主力阿歷斯山齊士同奧斯爾點解仲未傾掂數，部份原因都係對薪酬架構嘅嗰份堅持同執着，好似佢喺周五回應記者有關開出30萬鎊周薪利誘山神留隊嘅報道時就以笑否認：「等我計吓先，咁樣年薪即係幾多？OK。首先我唔可以證實有開出咁樣嘅條件，第二，我哋會一如以往……考慮財政能力去延續整隊嘅薪酬架構。可以肯定嘅係，目前嘅周薪等於20年前嘅年薪，日後會唔會繼續增長？我唔知道。我經常想答唔會，但我似乎錯了。」
因為好重要，所以雲格同日要講多次：「有人同我講：『即管畀佢想要嘅嘢。』但你之後唔可以再維持任何薪酬架構，甚至令整間球會陷入危機。你要以客觀方式作出決定，球會永遠喺第一位。我當然明白頂級球員一樣重要，但講到尾就算係主力，你都只能夠付出有力承擔嘅嘢。」據報由於有中超球會向山神開出高達40萬鎊周薪，所以經理人團隊就藉此同阿仙奴討價還價，但似乎感到被「逼害」或者「勒索」嘅雲格繼續對中超嘅一貫不屑態度，話頂級球員嘅首要考慮一定係同高手競逐頂級聯賽，所以中超根本不值一提喎。