鄭俊偉馬房「嬴風雲」今季已兩捷，表現不錯，會否已收夠籌，在季尾按兵不動，留力等下季再搏？相信答案是必定盡砌，周一（17日）沙田賽事肯定不會揸流攤！
點解咁講？4歲澳洲馬「嬴風雲」出自去年香港國際馬匹拍賣會，由馮國保以350萬投得，暫獲獎金$1,031,700元，馬主約分到70萬未回本。
須知馬會設有「香港國際馬匹拍賣會新馬獎金」，每一匹本港拍賣馬，在拍賣年度翌季整個馬季結束前，若首度在三班賽勝出，馬主可獲得60萬額外獎金，「嬴風雲」在港兩捷俱只是四班賽，而今季只餘3個月便結束，若馮國保想攞這60萬，其實剩下機會已不太多，所以今季之內必盡砌。
「嬴風雲」曾在同程1400米擊敗「世界紀錄」贏馬，當時輕勝個多馬位毫不吃力，而「世界紀錄」最近已攻陷三班，所以「嬴風雲」今仗在三班只負118磅排4檔，隨時可取得703,950元頭馬獎金外，還可獲額外60萬「拍賣會新馬獎金」。