禪師趕盡殺絕 ，Melo情何以堪？紐約人今季以31勝51負嘅戰績僅排東岸第12位，無緣季後賽，球隊圍繞安東尼（Carmelo Anthony）組軍嘅戰術似乎並未奏效，連同戴歷路斯（Derrick Rose）、普辛基斯（Kristaps Porzingis）嘅「三巨頭」威力亦不及預期。雖然面對球隊今季種種內憂外患，32歲嘅Melo一直保持低調慎言打好波，場均貢獻22.4分、5.9籃板，贏得唔少NY球迷尊敬，但總裁「禪師」積遜（Phil Jackson）整季以來咬住佢唔放，周五更公開向傳媒表示，Melo另謀高就可能更加好！
積遜喺記招上「大發牢騷」，話舊年同Melo表明球隊目前未必有能力爭冠，叫佢諗吓應該走定留，到今季圍繞選擇留隊嘅佢打造陣容，反而搞到嘅轉會傳聞滿天飛。除咗澄清自己季內轉推專欄同受訪時指控球太多唔係間接批評Melo，積遜又表示：「我哋目前有佢（安東尼）在場下唔能夠贏波。從球隊嘅未來出發，我認為佢喺其他地方會更好，喺有力爭霸嘅其他地方發揮佢嘅天賦。」
安東尼目前年薪逾2,600萬、2018/19球季先屆滿但可提前跳出嘅合約上雖然有「不可交易條款」（No Trade clause），但有報道指佢願意放棄相關條款從而聆聽交易報價；但佢一樣不甘示弱，極速喺instagram上載一張狄卡比奧（Leonardo DiCaprio）嘅《大亨小傳》劇照，配以「REALLY」加兩個笑哈哈emoji，以及#StayMe7o嘅hashtag，更有網民見到隊友普辛基斯有份畀like，睇嚟有心撐好兄弟喎。