邊個話陀住BB就要得正正喺度，乜都唔使做？美國29歲泳壇靚媽、奧運5金得主禾瑪（Dana Vollmer）周五陀住26周身孕，依然喺梅沙大獎賽女子50米自由泳游出27秒59，雖然時間唔算突出，喺83位參賽選手中只係排55位，但能夠完成賽事已經相當厲害，絕對稱得上係神奇女俠！禾瑪賽後坦言時間同排名都唔重要，只係相當慶幸能夠參賽，好高興再次見到各位里約奧運隊友，又向各位準媽媽分享心得：「將BB健康放喺首位，唔代表齋坐喺梳化上。咁樣對BB更好之餘，對我而言保持積極同強壯一樣更好。」
另外，禾瑪賽前同各位泳迷玩咗個小遊戲，叫大家估吓佢繼2014年誕下囝囝Arlen後，今次第二胎係生仔定女？答案就由禾瑪今日嘅泳衣顏色揭曉：係綠色唔係粉紅色，所以係囝囝，恭喜晒！其實禾瑪上次生BB雖然前後休戰兩年，但佢只係花咗一年時間就喺里奧復出，兼攞到一金一銀一銅，難怪今次一樣豪言喺7月預產期後會重投訓練，期望2020東京奧運第4度出戰！