馬會由噚日開始一連3日，喺沙田馬場同彭福公園搞同樂日，現場仲擺放咗由1,082位參加者完成嘅小型復活兔雕塑，難怪吸引到萬幾人入場去睇啦﹗加上噚日同樂日開幕，除咗有馬會主席葉錫安、行政總裁應家柏之外，仲有曾經協助曼聯勇奪三冠王嘅一代門神舒米高，舒米高仲親自落場同小朋友踢波㖭。
千人雕復活兔破紀錄
至於現場陳設嘅千幾隻小型復活兔雕塑亦相當威水，事關復活兔係由本地雕塑家曾章成聯同1,082位參加者一齊整，呢個壯舉仲即場刷新咗健力士最大規模雕塑課嘅紀錄。其實除咗有精采活動之外，呢次同樂日都好有意義㗎，因為馬會捐出1.1億多元畀65間夥伴機構，擴展新一年度嘅社區資助計劃，有大約110萬市民受惠。