香港喺場地單車賽，除咗李慧詩之外，又多咗個女車手要留意，佢就係20歲嘅馬詠茹。中四開始代表香港嘅馬詠茹，因為考DSE退役，不過入咗大學最後都係決定休學，16年尾跟返單車隊訓練。
李慧詩：「馬詠茹是一位勤力的女孩子雖然很愛美，也不惜犧牲自己的美貌，瘋狂健身。其實停了一段時間再進行正規訓練，需要很大的勇氣和決心，所以我對她很有信心。」
同Sarah係港隊短途賽主力，會一齊出戰團體賽，佢地喺場地單車賽嘅對手都星光熠熠。
李慧詩：「中國、俄羅斯同荷蘭，很多不同國家的車手也參賽，自己主要對手是德國和中國。」
中國講緊嘅係里奧團體爭先賽，奪金嘅中國車手鍾天使同郭爽，不過鍾天使因傷冇嚟到。至於德國就當然係勁敵，喺里奧爭先賽封后嘅女警禾高啦。仲有銅牌得主，英國嘅24歲年輕車手瑪珍都唔睇得少。
4月12至16號喺單車館上演嘅2017場地單車世界錦標賽，香港人唔係唔入場撐車神下嘛！