早前呂健威有副練洪國興離巢，之後部份馬匹拉走，到近日鎮倉寶「幸運如意」搏輸兼被貶，對馬房可謂有一定打擊。
所以呂健威為了穩定軍心，近期鬥志零舍強勁，賽駒不論冷熱照拼，如剛戰甚至重用小將吳嘉晉，爆出29倍的「順其自然」兼捧盃。
這天(14日)耶穌受難節假期，呂健威十分勤力沒有偷懶，先後搵李寶利、梁家俊、潘明輝等下周一（17日）沙田賽事合作騎師密斟，共商搏殺大計兼睇馬，其中呂健威最緊張的賽駒，毫無疑問是第10場三班1400米的「一道」。
話說今朝潘明輝幫師傅賀賢操完馬，即替「一道」往泥地大跑道快跳，馬兒走來渾身是勁，狀態非常吸引。操完原來呂健威早已在機坪守候，之後捉實潘明輝傾咗好耐，仔細聽取輝仔的匯報，有晒搏殺動靜。
「一道」近兩仗負重磅仍跑第三，均輸不足一馬位，反映質素不俗，今仗用潘明輝減10磅出擊，正好解決重磅缺點，如此部署擺明決心替此駒打開在港勝門。