財政司司長陳茂波（圖）嘅處女預算案，亦係梁振英政府嘅最後一份預算案，差唔多嚟到結局嘅時候，但都一樣遇到拉布，鬼叫梁特走數冇推全民退保咩。立法會秘書處噚日公佈咗，收到745項議員提出嘅修正案呀！
其實議員提出嚟嘅修正案，內容不外乎係削減官員人工，上至特首、下至局長，人人有份，當然亦有唔少係削減部門嘅開支啦！呢745項修正案中，有約500項都係社民連梁國雄一人提出，事關佢講到明因為梁特唔推全民退保就會拉布，至於人民力量陳志全都有大約70項。唔知係咪大家都覺得梁特已經冇得留低，所以喺提出修正案嘅時候都留咗手，上年有2,168項咁多，今年嘅數目係呢屆政府5年裏面最少。