子華神講過，呢個世界係乜嘢都有得拗嘅。當大家以為學界辯論仲停留於「中學生應否談戀愛？」嘅話就大錯特錯。事緣最近兆基創意書院（圖）喺辯論比賽入面，拋出「多啦A夢（八方會叫叮噹）對大雄的成長利多於弊」為辯論，令大家對辯論呢項看似沉悶嘅活動添上色彩。
據報道講，實情呢個咁有趣嘅辯題，源於寶血上智英文書院自2012年開始搞嘅「奇趣盃」學界辯論比賽，當年決賽嘅題目就係「人類不應主動接觸外星人」。經過多年嘅發展，佢哋今年嘅比賽題目已經化成為「自修室是『學界蘭桂坊』」、「周柏豪比周杰倫更適合成為岑晉晴男朋友」，以至「譚仔應聘請粵語發音純正的員工」等等。
可能有人會覺得呢啲辯論無聊或者唔正經，但諗深層要認真辯論呢啲題目的話，必須有嘅知識不正是全人教育提倡嘅嘢咩？