理大又有新發明揚威國際。機械工程學系將高速傳導性能嘅納米材料植入半導體納米纖維，既可提升太陽能電池效率，又可提升光觸媒清潔空氣功能，呢項發明喺第45屆國際發明展攞到「評判特別嘉許金獎」，亦已獲美國專利。
高效10倍 成本低
理大機械工程學系創新產品與科技講座教授梁煥方（圖）用咗5至6年時間研究。現時市面嘅光觸媒空氣淨化機同消毒器，多以二氧化鈦做主要材料，呢種舊技術嘅光觸媒有一定限制，包括二氧化鈦粒子噴灑於空氣後，易被吸入人體，危害健康，而將一氧化氮轉化為二氧化氮效率較低，對陽光反應亦較低。
教授將二氧化鈦嘅形態改變，由納米粒子變做鈉米纖維，同時於二氧化鈦內加入石墨烯，呢種技術叫TZBG，同樣可做光觸媒，但淨化效率高10倍，可吸附有害分子嘅面積亦增加高達43%，但成本就比舊技術低好多。呢種技術仲可用做手提空氣淨化器、空調系統等，理大正與不同企業商討合作可能，希望將技術產業化。