日本動漫中見到紅色、有角，就會聯想到有三倍速嘅紅渣古，咁著住呢件紅色波點戰衣，仲擁有兩隻角（一對耳）嘅「紅衣醒神」豈不是仲會快過三倍嘅速度？難怪呢匹馬出道以來10戰7勝，兼從來都未甩過前四名。
「紅衣醒神」上仗初次進軍分級賽就已經好叻仔，以四歲之齡摘下路途長1200米及總獎金400萬港元嘅短途錦標，最後仲升到128評分同兩位馬壇老大哥「友瑩格」及「幸福指數」齊齊三分天下，所以呢匹快過三倍速嘅紅色跑車，一直都被馬迷公認喺極具潛質可以問鼎未來短途王嘅美譽，就連練呢匹馬嘅蔡約翰都對呢架跑車嘅表現讚不絕口。
蔡約翰說：「我當然非常滿意，牠一直都在進步，而且表現一直忠心準繩。我們看到牠經常身處一個有利爭勝的位置競逐，所以當日的賽事形勢十分適合牠，所有條件都對牠有利，結果勝出了漂亮的一仗。」
不過「紅衣醒神」想正式登基做短途王，先要面對一個難題，就係需要贏走喺5月7號舉行嘅一級賽1200米主席短途獎。
因為除咗要打贏一眾本地對手之餘，仲要應對來自五湖四海嘅怪物級別對手嘅挑戰，並作出迎擊，例如擁有旋風式後勁、要打衛冕戰嘅澳洲灰色短途神獸嘅「尚多湖」，仲有早前彈甩兩個馬位贏一級賽嘅「精彩鬥士」等等。
蔡約翰表示呢場賽事當然係一場更難跑嘅硬仗，但認為呢匹馬一直做到馬房要求嘅事，並希望下次亦都能夠做到。
不過有神仙之稱嘅蔡約翰肯定會攞晒啲私伙仙水出嚟幫手，為「紅衣醒神」贏下首場一級賽勝利。