國務院總理李克強早前發表嘅總理工作報告，提出規劃粵港澳大灣區，嘩，阿爺話明要大搞喎，升呢政協副主席無耐嘅特首梁振英，點可以唔嗱嗱臨做嘢響應？下星期佢就帶成30幾人嘅特區政府大隊到大灣區城市，例如廣州、肇慶、佛山等考察3日，了解各市基礎設施兼會見省嘅發改委官員，似乎好怕執輸，八方聽聞就連中聯辦內部都已經組團到大灣區考察，而CY此行動力，可能係因為葡萄林鄭太有為喎！
奶媽搶到河套地晒命
有政界花生友笑笑口同八方講，梁振英呢鋪唔博唔得，一嚟可能想喺7.1離任前攞啲彩，二嚟亦因為唔少內地城市都流晒口水，想喺大灣區分豬肉，而發改委話到明，大灣區內城市要避免惡性競爭喎，難怪CY要急急仆去視察霸定位，否則分分鐘爭唔到好嘢，據知如創科、法律等高增值項目範疇，都係香港嘅重點搶位目標，視察後就向發改委交意見。
花生友話喎，唔畀林鄭搶晒風頭，可能都係CY此行目的，皆因若然講到要同中央爭取惠港政策嘞喎，林鄭可能比梁振英更積極，最明顯例子莫過於林鄭做政務司司長嗰時，同深圳政府簽訂合作備忘錄，共同喺落馬洲河套地區發展「港深創新及科技園」，確認香港自1997年7月1日起，就擁有河套區嘅土地業權，政界中人話呀，此舉等同喺深圳手上搶塊地番嚟，少啲功力都唔得。
據聞林鄭私下亦對此沾沾自喜，覺得自己做到嘢，時而向外提及此一奇功，又難怪CY要搵其他嘢嚟邀功。而喺下周帶隊到大灣區考察前，CY就會喺星期六至下周一離港放復活節假，喺佢離港期間，政務司司長張建宗會署理特首職務。
李八方