李斯特城難得成為歐聯8強唯一英超「生還者」，球隊喺周三表現亦絕不失禮，首回合作客只係僅負馬德里體育會0:1。不過，約有100名「害群之馬」球迷賽前就喺馬德里Plaza Mayor廣場鬧事，除咗搞到成地垃圾，仲有人高唱：「你班西班牙混蛋，直布羅陀係我哋嘅（You Spanish b******s, Gibraltar is ours.）」雖然直布羅陀至1713年俾西班牙政府割讓予英國後一直係英國殖民地，但西班牙持續對直布羅陀虎視眈眈，包括上月尾英國首相文翠珊喺「脫歐」公開信遺漏提及直布羅陀後，即刻公開聲稱對直布羅陀脫歐後嘅協議擁有發言權。
愛國憤青同一鼻孔出氣呢家嘢，英國人就唔多欣賞啦，好似李斯特城名宿兼評述員連尼加就喺twitter表示：「啱啱睇咗部份李城球迷喺馬德里無恥搞事嘅片段。少數白癡令大部份理性球迷蒙羞，令人作嘔。」另外，早喺周二晚已經有8位李城球迷俾西班牙警方拘捕。