想一睹著名作家兼《蘋果日報》嘅前社長董橋手稿、書法真迹嘅「董迷」有福嘞。董橋獲蘇富比邀請舉辦「讀書人家——董橋書房剪影」展覽，一次過展出逾100件佢嘅書畫珍藏，並有佢嘅書法作品同從未曝光嘅寫作手稿如《清白家風》等，董橋更特別借出家中嘅酸枝書桌同書櫃，等呢個出品唔少經典著作嘅「董書房」活現書迷眼前。
親身導賞辦簽書會
董橋話佢1967年開始喺報章寫作同繙譯，今年正值50周年，希望為多年筆墨生涯作紀念。筆耕半個世紀，佢坦言冇捷徑，只靠用功，否則寫唔到好文章，「必須好寂寞咁閂埋門喺書房入面用功」。佢直言時下唔少作品狗屁不通，唔係中文，自己更加要保持風格對抗呢類文風。
講到藏品，佢認為每項收藏都係一種緣份，好似對佢文風影響好深嘅書畫家溥儒，佢嘅小手卷《瞿塘歸櫂》，董橋八十年代喺摩囉街收藏品店曾對佢一見鍾情，但經歷幾十年先喺紐約拍賣會高價投得呢樣心頭好。展覽本月18至29號喺太古廣場蘇富比藝術空間舉行，免費入場；23號部份作品將轉換，董橋當日會為新書《讀書便佳》舉行簽書會。
