光陰似箭、日月如梭，話咁快回歸20年，當年鄧小平拋咗一國兩制方案回收香港，信誓旦旦50年不變。𠵱家不過20年，香港仲係咪一國兩制？唔使八方多講；電台節目主持人曾志豪孖埋文化人陳嘉銘，下月13日一連兩日喺新光戲院，搞場笑中有淚「回帶廿年棟篤笑」，同大家一齊話當年。
搵老鄧同鐵娘子上身
曾志豪話，講到97回歸，一定要搵番《中英聯合聲明》嘅關鍵人物鄧小平同戴卓爾夫人，「我哋利用高科技，搵咗老鄧同鐵娘子上身；因只夠錢用土炮，陳嘉銘個頭會變成老鄧，個身仲係陳嘉銘，到時會質問老鄧點解要收番香港」。
佢話仲會講買樓，「5年前我講過港人搶住凶宅，都要賣成230幾萬，今時今日睇番呢個價，超值！𠵱家住劏房樓幾百萬」。另一拍檔資深傳媒人蕭潮順話，佢哋同華星冰室早前推出以97價$9.7限售100份多士、奶茶套餐已經掃光，即日起至下月12日則推出$19.97嘅「回帶廿年套餐」，包括特區鴛鴦、滷平（港澳辦前主任魯平）雞翼、肥彭蛋撻，希望勾起港人集體回憶。