林鄭參選特首時嘅政綱，提出政府架構重組，但佢講明唔會好似梁振英咁，未上任就推改組，會等正式就任後先處理。八方聽聞林鄭任內建議增設「文化體育局」，勢在必行，一班提名過佢嘅文化、體育等界別選委，都靜心等待新局嘅到來。
傳黃英琦係黑馬
若然真係設得成文體局，邊個揸莊都好受注目，早前汪阿姐已經力撐現任民政事務局副局長許曉暉更上一層樓，大讚佢關心文化好啱做掌舵人。但政圈亦傳出另一可能嘅黑馬，話黃英琦都係人選，皆因佢同林鄭喺西九文化區都合作過，但頂唔頂得順建制打「毒針」嗰關㗎！
而現任民政事務局局長劉江華盛傳調任政制及內地事務局，邊個接任做？有知情人士話民政局關係到地區、政黨政團分餅仔，掌地區資源話事權，各大小選舉亦涉其中，阿爺一定要搵根正苗紅兼壓得住場嘅人做，由何志平到曾德成再到劉江華，統統夠晒紅；許曉暉紅就夠紅，但對地頭蟲卻壓場力不足，若要擺平地區爭端或力有不逮，係咪直接升呢坐正仲係問號。