以雷神莫雷拉為首的六位華洋騎師今晚（12日）都要停賽，有點蜀中無大將之感。結果頭場由見習騎師巫顯東勝出「天狼星」。到第二場四班1200米，則由十三少韋達發威，佢以蘇偉賢馬房落飛馬「和諧小子」力壓大熱門「英姿茂盛」建功，單Win及組合獨贏A3分別派78及40.5元。
「和諧小子」之前四戰全於田草三甲不入，這次轉場首戰谷草，呢匹四歲馬復配韋達沿途帶放，直路雖受潘頓座騎「英姿茂盛」從外側追上威脅，一度似被超越而落敗，但「和諧小子」人有馬有的情況下，拉士從內叠回氣再衝，以短馬頭位之先率先衝線，服役首次上名即贏馬開齋。
蘇偉賢表示「和諧小子」之前跑了幾場 ，令人感覺沒有特別之處，但他深信此馬質素並非太平庸，只是馬兒有很多壞習慣，例如很多時如小朋友般仰天望地，對四周感到好奇，不太專心競賽，他曾在馬匹配備上下功夫，不過效果一般。由於「和諧小子」有天生速度，所以轉跑快活谷，果然試出彩虹，練者又表示，上季馬兒曾有蹄甲問題，今季健康回穩，希望今場取勝後，可繼續取得表現。
韋達早前犯規，被罰本月20日起停賽兩天，今場頭馬正好俾佢補償損失，佢同蘇偉賢季內之前合作三捷全於沙田，「和諧小子」造就佢哋今季首度攜手揚威谷草。
第二場二至四名分別為「英姿茂盛」、「日東昇」及「放下自在」，四重彩派一萬一千幾。