東方龍獅首次踢亞冠盃，早就計劃安排球迷會組團作客打氣，可惜首場作客廣州恒大喺最後一刻取消，仲要賠錢畀球迷；今次訪水原藍翼就有約40位粉絲（圖）睇波順便旅行，團費只係幾千蚊，算抵玩。
免費熱咖啡暖入心
雖然到咗四月，但南韓仲幾凍，日夜溫差好大，下晝近攝氏20度，但噚晚場波現場就得七、八度。現場所見，主隊唔少球迷都帶備藍翼毛氈保暖，而主隊喺半場前仲向傳媒提供熱啡（圖），認真窩心。
東方硬食魔鬼賽程
東方龍獅今午就起程返香港，預計黃昏返到，周五復操，周六就喺足總盃八強鬥九巴元朗，即係隔兩日就要開波。據聞，東方曾經向足總提出改期，可惜被拒，教練陳婉婷（圖）惟有頂硬上同輪換啦。
