啱啱去完北京攞委任狀嘅候任特首林鄭月娥正積極埋班，政界都喺度「估領袖」，首位女特首講明會多搵女人埋班，但唔係所有女人都願意走入「熱廚房」，聽聞環境局副局長陸恭蕙請咗林鄭食檸檬，所以黃錦星留任行情又未至於太淡。
黃錦星過去五年嘅表現，喺官場唔算特別好（可能最成功係推出同佢好似樣嘅大嘥鬼……），據知內部會議討論經常唔出聲、冇畀意見，兼夾成日好似唔知發生緊咩事，所以有陸恭蕙呢位女強人坐鎮，一柔一剛，令環境局未至於太差。
但陸恭蕙唔知係咪不甘屈就於林鄭之下，有傳佢畀咗檸檬林鄭食，令林鄭嘅女將班底又少一人，同時有人留意到，黃錦星早前被問到係咪留任時話持開放態度，莫非等緊冇人接棒嘅留任機會？
而作為新政府重點要搞嘅教育，邊個做教育局局長都好重要。有人話副局長楊潤雄表現唔錯但唔得奶媽歡心，聽聞自言「打呔返工就興奮」嘅張建宗都係人選。張建宗做過教育署署長，對教育唔算零認識，而佢講到明做邊個崗位都冇所謂，似乎唔係冇機會。
邱騰華聲稱退休
至於其他局長人選，有傳梁粉創新及科技局局長楊偉雄近日俾人四圍唱佢做嘢唔掂，咁邊個可以頂替佢？官場留意到科技園主席羅范椒芬不時就創科問題發表意見，猜測佢係咪重返官場？護士出身有學術背景嘅陳肇始係下屆食物及衞生局局長嘅大熱，但有人擔心佢面對霸氣醫生能否壓場？至於特首辦主任邱騰華，聽聞佢近日話會退休，唔通同梁振英一齊告退？
李八方