冇咗雷神壟斷頭馬，華人騎師這晚（12日）谷草輪住建功打爭氣波，第四場四班1200米就見到吳嘉晉打破個人逾半年頭馬荒，佢騎呂健威馬房「順其自然」後上一攻而破，爆29倍落飛冷Win，捧走印度遊樂會挑戰盃，組合獨贏A3派23元。
出身馬會見習騎師學校的吳嘉晉現年27歲，是告東尼徒弟，這晚賽前佢季內僅於去年9月28日憑告東尼馬房「開心駿馬」，在谷草1800米贏過一場賽事，之後佢逢跑例輸，有段時間更因打壁球受傷缺陣，個人食足近7個月白果，成為僅勝賴維銘的季內次低排名華人大師傅。
吳嘉晉這次賽前，只曾於2011年7月1日田草1800米，憑「飛騰」（已退役）為練馬師呂健威建功一次。這晚兩人僅合作「順其自然」，此駒留前鬥後，沿途守在第九、第十位，末段一陣風般殺上贏0.75馬位，29倍爆冷得手，成為騎練相隔近六年後另一匹合作頭馬。四歲馬「順其自然」11次出賽初跑谷草，成功打開服役勝門。
呂健威表示「順其自然」並非早熟，過往健康曾有問題，感謝馬主給予耐性和時間，近期馬兒健康回復穩定，加上本身日益成熟，馬身轉壯，故交出表現。
第四場賽果冷頭熱腳，二至四名順序為「得意繽紛」、「快馬奔馳」及「紅褲精神」，四重彩派七萬八千幾。