BCT銀聯集團董事總經理劉嘉時成日幫業界宣傳強積金，而且喺政府做過唔少公職，好似香港退休計劃協會主席、香港信託人公會副主席咁，之前又係最低工資委員會委員之一，真係大忙人一名。
好似噚日嘉時約咗一班傳媒聚會，一坐低，茶都未得閒飲啖，就話係啱啱開完會趕到，一日都係多得自己叫「嘉時」，搞到成日做嘢都要「加時、加時」，有時都會諗吓不如改過個好名。
佢話自己有八兄弟姊妹，其中二哥劉嘉敏，大家比較熟悉，佢係香港首任個人資料私隱專員，同佢換名就最着數，一來可以簡單改番個英文名「Carmen」，二來「嘉敏」比「嘉時」呢個名仲女仔啲呀。