踏入季尾，除咗英超爭標明朗化，不外乎車路士同熱刺之爭外，英冠、英甲升班都算明朗。英冠白禮頓同紐卡素，冠亞軍兩個直接升班位都穩；英甲方面，錫菲聯穩奪冠軍，保頓直升機會都好高。講開保頓，昔日都喺英超威過吓，兩位同保頓有關嘅人近期當旺。前領隊艾拿迪斯近期帶水晶宮殺低車仔，星期一又數阿仙奴；前球員馬高斯阿朗素（右）幫車路士對般尼茅夫入個金球，好大機會拎到個人首次英超。
車路士今季成功之處，就係建立到無敵3-4-3體系，而且絕少變陣；其實阿朗素係八月轉會市場關閉前先由費倫天拿加盟，以佢之前只不過踢保頓，唔少人都質疑干地呢次做水魚，不過自從大敗畀阿仙奴而轉踢3-4-3後，阿朗素就成為車仔不可或缺嘅一人。佢亦充分演繹出左翼衞可攻可守嘅本色，已經累積五球，猶勝加利卡希爾、大衛雷斯等「帶刀侍衞」。
講開阿朗素，今次都真係光宗耀祖，其實佢三代都係足球員，阿爺代表皇家馬德里五奪西甲，老竇都踢過巴塞隆拿，而佢自己就出身皇馬青訓，叫做唔嘢少，但喺皇馬、保頓都冇咩機會。當然，有千里馬都要有伯樂，干地今季用到佢出神入化，今季英超最佳領隊唔係佢仲有邊個？
文：牽牛