嚟緊星期日就係曼聯對車路士嘅英超大戰，小弟同牽牛兄當然借機講吓呢兩隊波啦。今季摩連奴嘅曼聯總算建立咗一條中軸線，由伊巴謙莫域、保羅普巴同埋安達靴里拉組成，但單靠呢條中軸線，攻力疲弱，因為今季嘅曼聯淨係識入人中路，兩翼基本上斷晒。
今季曼聯最多嘅進攻模式就係69連線，即係普巴放波畀伊巴去搞，不過中路係人最多嘅地方，就算普巴同伊巴係勁，要打入去嘅難度都好大。曼聯進攻最大嘅問題係兩翼斷晒，拉唔開球場闊度，好少有質素嘅底線傳中波。睇今季喺曼聯兩翼最有威脅嘅球員，應該係路爾斯華倫西亞（左），係一個右閘。
華西係曼聯近幾季側擊力最強嘅球員，一來佢快得嚟大隻，二來佢嘅踢法係鍾意落底，唔會令中路更加多人。華西側擊出色，凸顯班翼鋒唔掂，例子有安東尼馬迪爾同拉舒福特，幾多假身假腳都不如華西一招實際。因為有桑馬達，曼聯呢幾季嘅策略都係左實右虛，左路重有球而右路重無球，左邊負責帶波突破，右邊就入楔禁區，頂多係華西上嚟幫吓手出波；福仔同馬迪爾踢左翼突破唔到，令到曼聯兩翼進攻廢晒，係得華西一個支撐。假如阿歷斯山齊士離開阿仙奴，曼聯梗係要搶啦！
文：咖喱