唉，英雄遲暮大家聽得多，但今時今日45歲唔算好老啫，喺外國好多騎師四十幾五十歲，仲都活力十足屢贏大賽。偏偏13屆香港冠軍韋達，近一兩年常予人hea騎、堅決安全至上感覺，跌watt跌到暗淡無光。
好似剛戰田草二班2200米，韋達騎大摩之「喜蓮彩星」，其發揮唔少馬迷或有意見，係咪應該唔止得第五？見仁見智啦，總之韋達就平平安安過終點囉！
不過，大摩就繼續支持韋達，下周一(17日)沙田日賽，將有「駿皇綵」再俾韋達操刀，角逐二班草地1200米。呢匹馬在港三戰全勝，有幾勁毋須多講，公認係下季大摩短途級際賽重要籌碼，今仗留在二班路程不變，只比上仗多負1磅至127磅，真係着數到暈。
韋達都應深知自己大賽座騎買少見少，如果想下季保住「駿皇綵」帥權，最佳方法當然莫過於今仗為此駒保持不敗。