由於保安局局長黎棟國已屆退休之年，相信唔會留任下屆政府，未來局長大熱人選，順理成章係現任副局長李家超，話晒做過一屆夠經驗，接手唔使重新磨合。但八方聽聞，林鄭訪京後嘅保安局局長大熱之選，已變成入境事務處前處長陳國基（KK），唔通KK先至係阿爺嘅屬意人選？
林鄭訪京後行情高漲
舊年4月退休前休假嘅KK，政圈風評唔錯㗎，之前傳過佢會接替白韞六做廉政專員，但林鄭北上同京官傾組班後，政圈即時傳出KK先係掌保安局嘅真命天子。有政界中人話，特區有幾個政策局嘅掌舵人，中央特別睇得緊，必須獲高度信任，除咗掌管大量地區資源分配同選舉事務嘅民政事務局，保安局都係其一，打擊激進港獨同外國勢力喎，唔信得過又點得？大家又唔好忘記，未來高鐵或一地兩檢，涉及出入境政策，KK做過入境處將來咪更加得心應手？事實上KK做入境處處長時，同內地相關部門打過唔少交道，人脈關係相當不俗，而且現年58歲、較60歲嘅李家超年輕兩歲，難怪加入林鄭班子呼聲甚高。