會計界立法會前議員譚香文舊年同另外三人合組名單參選特首選委會，請咗公關公司幫手搞選舉，結果四人喺會計界全勝，但鬧出拖數官司尾巴。
公關公司入稟小額錢債審裁署，話譚香文服務費有尾數4萬4未找，但係譚香文反咬間公司冇履行合約大部份職責，更大數佢哋工作能力奇差，仲話要入稟區院反索償超過6萬幾銀。
根據入稟狀，間申索公司A Workshop Communications Limited舊年11月同譚香文協議收10萬蚊包辦選舉團隊嘅公關工作，選舉結束後，譚香文本開咗張5萬蚊支票找尾期數，但彈咗票，佢答應會找數但冇下文。
公司嘅客戶總監何靜慈話，四人團隊裏面只有一人肯畀佢自己份尾數，所以公司𠵱家只追大數剩番嘅4萬幾蚊，仲爆譚香文佢哋申報選舉開銷時，報足晒10萬蚊公關費！
譚指對方做嘢慢唔熟例
譚香文噚日大數間公司做嘢慢、唔熟選舉條例、連寄選舉郵件都唔熟，差啲搞到佢哋觸犯選舉條例，所以先要向公司反申索。因為佢要入稟區院，所以單小額錢債案就押後到下個月5號先再開庭。