政府今年預留6.4億慶祝回歸廿周年，康文署分到成1.9億，嚟緊會同海外博物館合作搞5個大型展覽，好似6月起文化博物館會則有「八代帝居——故宮養心殿文物展」，由北京故宮首次借出雍正同乾隆嘅御書、印璽、玉器、木器、銅器、瓷器、佛像和其他文物；11月至明年3月嘅「絲綢之路」展覽呢，獲阿爺支持，至少一半展品屬國家一級文物，算唔算皇恩浩蕩呢？
想睇鬼佬嘢嘅，4月尾文化博物館有「羅浮宮的創想：從皇宮到博物館的八百年」，展出超過130件羅浮宮收藏品。6至10月科學館亦都有「永生傳說－－透視古埃及文明」，由大英博物館借出6具木乃伊，仲會用電腦斷層掃描（CT Scan）技術，一層層咁解構千年古屍嘅衣着、皮膚，甚至內臟。
康文署下半年起更分別喺港島東體育館、近港鐵大圍站及近文化中心，擺放3個24小時運作嘅自助圖書館站。署長李美嫦指，圖書館服務已經20年冇加過價，未來會檢討調整收費。