香港嘅補習天王，唔少都好chok兼係扮嘢王（嗱嗱嗱，八方所指嘅只係形象同教學手法啫），未來又有位新貴入行，仲兼具法律背景同從政經驗，大律師林作噚日由律師代表向高院原訟庭申請放棄大狀資格獲法官批准。
原來就係為咗迎接呢個新工作平台，佢下月會喺遵理學校開班教英文，但春風化雨似乎唔係佢轉行原因，「我要儲老婆本，越多越好，要給老婆一個家」。
身為英國牛津仔，英文當然talk得兩嘴，但點解忽然冒住被指「誤人子弟」嘅風險去教書？27歲林作話係機緣巧合，皆因有朋友知佢想搵錢，咁啱又知遵理有個新計劃想搵喺英國讀書嘅港人開班，非常即食式地一拍即合。除咗一星期教幾堂書，仲會幫手度橋宣傳，向來鬼馬嘅佢話拍短片強攻social media都係方向嚟㗎。
「大狀搵嗰萬零二萬」
林作強調轉行為咗一個字：錢。乜佢做大狀時冇嘢撈咩？「唔係我個人嘅問題，係呢個大狀行業嘅問題」，佢引述有報道講過入行一兩年嘅大律師，每月搵嗰萬零二萬蚊；轉行後嘅收入當然係商業秘密，但希望年薪有7位數字喎！
查實就算轉行，都唔使放棄大律師資格啩？「呢個係好特登嘅動作」，佢話有個大律師身份，想做其他嘢都有限制，人哋都未必搵你合作，換言之搵錢機會又少啲，所以必須畀人睇到佢嘅決心。
「都係入張紙放棄，第時想重操故業，又係一紙搞掂」，對佢嚟講唔大損失，所以暫時搣走限制轉型嘅框框！
講到呢度，八方有疑問，乜養十優港姐要好多錢㗎？噢，差啲唔記得，佢同麥明詩盛傳分咗手喎……咁係咪已經有「老婆」對象？林作高呼自己好專一，「我從來只係一個人咋喎……」一貫故弄玄虛，冇講明係咪麥小姐，反而侃侃而談容海恩，莫非變咗心？
咁諗大家就太多心，佢解謎話有位評論員喺網台節目質疑過佢轉行，係中共想派佢混入學生群做卧底，抗衡本土派喎，多謝對方抬舉之餘，仲令自己心生疑惑：「係咪因為容海恩令中共發覺，起用大律師玩滲透已經唔work呢？」
李八方