貴為主席都要再培訓，因乜解究？僱員再培訓局噚日公佈年度計劃，主席梁永祥繼化身飛機師後，又有新搞作，轉職做理髮師，仲搵埋牛頭角靚婆婆畀佢操刀，揸起理髮刀似模似樣，手勢亦有板有眼，不過佢笑笑口話都有手震，最難修剪係髮腳，而且過程要不斷俯身，一啲都唔容易，「有70分，婆婆冇投訴，我算OK㗎啦」。
梁永祥上月參加再培訓局特別班學理髮，共4堂6小時，想帶出一個訊息，就係每個人只要肯學肯練，都可以成功學到一門技能。但點解要學理髮呢？「如果學得唔差，可以義剪，做社會服務，幫老人家剪髮」，但要剪都要兩年後，因為佢再度冧莊續任再培訓局主席，而行政總監吳家光8月離任，由前勞工處副處長吳國強接任。