民主思路成員早前訪台，隨行理事黃梓謙（Gary）踩場同台北市長柯文哲舌戰，反駁指香港有自由亦有靈魂，「否則就不會堅持尋找民主突破」，成為一時佳話。原來呢件事令Gary突然多咗好多粉絲，facebook連日都有台灣、新加坡同內地人想add佢做friend，相信係佢此行嘅意外收穫！
讚柯P夠直率
八方問過Gary，佢笑笑口話舌戰事件係意外，事緣有個喺柯P辦公室做嘢嘅台灣朋友知道佢訪台，亦知佢好留意柯P動態，咪邀請佢出席呢個有柯P嘅座談會。本來都無意舉手講嘢，點知柯P講講吓又講到香港，然後主持人就話現場有位香港嘅參政人士，「結果在場嘅台灣記者隊啲咪畀我，叫我講幾句，咁我咪講吓」，其後先發現事件喺台灣好受關注，「十幾個新聞台都有報道」，仲有當地甚至新加坡傳媒約佢訪問。
雖然同柯P擦出火花，但佢話對柯P嘅印象唔係負面，「佢都係好直率咁講意見」，仲話柯P每本著作都睇過，亦好欣賞佢嘅選舉模式，多啲交流分享係好事。