香港有種階級叫「打工皇帝」，年薪過億，多年來，香港出晒名嘅打工皇帝主要得一位，就係長和（001）主席李嘉誠嘅左右手霍建寧，舊年袋2億銀。
但近幾年多咗才俊力追，「股王」騰訊（700）最新年報披露，總裁劉熾平舊年薪金2,800萬人仔，但夾埋認股權（option），總年薪達到1.22億人仔（約1.37億港元），所以佢耐唔耐都因個人財務安排，沽些少套現。
有option係爽，但都唔夠一炮過攞現金咁過癮。恒大（3333）行政總裁夏海鈞，前年總年薪1.68億人仔（約1.89億港元），當中約1.5億人仔係現金，恒大應該就快出舊年年報，好快就知夏總爬唔爬到霍大班頭，又袋2億嘞。