各位曼聯球迷，只要贏出呢個冇獎問答遊戲，你就叻過「寸王」摩連奴！問題係，邊位前曼聯球員又名迪亞高（Diego）？
3，2，1，夠鐘！答案係2002到04球季效力過曼聯、現年37歲嘅烏拉圭射手科蘭（Diego Forlan）！話說喺周日曼聯作客大勝新特蘭3:0嘅英超比賽末段，摩佬喺後備席聽到有曼聯球迷喺度唱「Diego~Diego~」，搲爆頭都唔明佢哋唱乜，惟有向身後嘅老大哥卡域克請教。不過，寸王始終係寸王，就算卡域克解釋埋啲歌詞，摩佬只係露出一臉不以為然，就繼續睇波了，唔通佢嘅反射神經淨係諗起車路士舊部迪亞高哥斯達？