將電力送到每家每戶嘅地底電纜網絡，大家應該好難先會見到，但中電卻喺啱啱過咗嘅周末，喺理工大學校園設置工作坊，首度畀市民親手接駁供電電纜，近距離體驗呢門專業手藝，解開電掣後嘅神秘面紗。
電纜就好似人體嘅血管，要連接完整網絡，先可以輸送到各個位置。中電營運總裁（Chief Operating Officer）蔣東強當日亦落場駁電纜，佢形容駁電纜猶如外科手術，好考工夫，難怪當日唔少「電纜醫生」全神貫注，搞到滿頭大汗㖭。
呢次由理大舉辦為期兩天嘅「Maker Faire HK2017 x造大世界」，雲集本地同外國超過150位充滿熱誠嘅Maker，推廣創客（Maker）文化，中電除咗展示接駁電纜手藝，仲開設太陽能模型車工作坊，等小朋友認識太陽能發電嘅原理。