金鐘太古廣場（PP）可謂見證本港自由行興衰，早幾年自由行當旺，好多高檔品牌去PP擴充營業，但隨住自由行威力銳減，高檔品牌又要面對現實，縮減舖面。好似英國品牌Burberry，5年前喺PP開兩層旗艦店，前年底決定租少地下一層，太古廣場新近就將呢一層租畀Pure Yoga，預計今年8月開業。
PP近年亦因應自由行減少而改變租務策略，引入更多食肆，家陣連瑜伽中心都有，對於不少中環或者PP樓上返工嘅OL嚟講，應該都幾有驚喜，以後lunch或放工後可以做番一粒鐘瑜伽，呢度有成一萬呎，空間感應該唔錯，可以唞下氣。