想360度睇晒香港單車館入面係點樣？咁就要click入嚟睇吓喇： http://bit.ly/2nQgTwV
今個月12至16日，香港單車館就會上演場地單車世錦賽！屆時港隊一班選手，包括李慧詩同梁峻榮等，就會喺呢度同世界各地嘅單車高手鍊過。要撐自己人，事前梗係要做足功課，即刻同大家介紹吓香港單車館！
呢個場地喺將軍澳港鐵站行十零分鐘就到，唔難搵。喺10年動工 13年起好，港府使咗11.3億，固定座位2,000個，另外1,000個係臨時嘅。除咗踩單車，仲可以玩其他運動㗎。
前港隊場地組教練仇多明話：「平時香港單車隊嘅練習，好多時都有人打羽毛球、排球同埋籃球。有時候打羽球嘅人見到李慧詩或者梁峻榮，都會幫佢哋打氣，氣氛會更高漲！」
大家上網睇片都見過唔少場地單車比賽，條賽道有唔同顏色嘅線，點解呢？仇多明話：「藍區以上係跑道，以下係安全區，一般嘅跑道都係闊七米，黑色係測量線，一個圈係250米。紅色線係用來區分跑道，如果有車手進入黑紅線，叫做爭先道的範圍下，其他車手要爬頭，要喺上面爬頭。紅線至籃線叫超車區，係專用來爬頭嘅。」
撐自己人除咗要熟悉條賽道，坐喺邊度睇都好緊要。仇多明話：「終點線嗰邊叫A區，終點線之後嘅一、二號彎叫D區，我自己的推介係C區，因為C區呢個位置睇得通透啲。B區嘅彎位係睇咩呢？就係好多時候車手最後超越，就會喺嗰度，如果鍾意睇爬頭嗰種競技嘅感覺，喺B區向下望，感覺好強烈。」
首兩日12至13號，票價最平50蚊，最貴160蚊，之後三日貴啲，75至400蚊不等。
票價詳情可以去呢個website check： http://bit.ly/2oUKabK
想睇更多蘋果360VR片？Apple用家可以前往App Store下載《蘋果VR》： http://apple.co/2oMRqt0
至於android用家亦可在Google Play Store下載： http://bit.ly/2oR9G1u