哈哈哈，唔好以為Mary咁巿儈，唔係講緊1,800萬元，係講緊1,800萬個retweets。
話說美國奈華達州一個十幾歲嘅學生Carter，大概是太愛食雞件（麥樂雞那種呀），一日忽發奇想，在Twitter問Wendy's要有幾多個轉發你先請我食一年雞件，呢種留言，有人雖然開晒品牌社媒賬號，但往往連mon都唔mon，有人mon到都未必覆，但係Wendy's個admin好盞鬼喎，一句大過去——千八萬啦，Carter亦立即霸氣回覆：包在我身上！
嗱嗱嗱，雖然大家都快人快語，但唔好以為好易，Wendy's今次個標準真係set到好高，因為史上最高轉發量嘅推文，都係320萬咋，Carter小弟要六倍破紀錄先贏到一年免費食雞，不過Carter小弟的號召力確唔嘢少，幾日間，已經累積已了逾200萬個轉發，就算未必可交足數，但真係隨時破到Ellen DeGeneres張奧斯卡selfie創下的320萬紀錄。
老老實實，今次誤打誤撞的世界紀錄挑戰，最大得益者當然是Wendy's，世界各大傳媒紛紛報道，直情係錢都買唔到嘅宣傳，咁你真係要讚吓人哋社媒策略高明，且執行得力。賬戶人人有，但你有冇人哋咁互動？Admin哥哥姐姐又有多大權限先？「夢想辦」團隊最近紅到冇朋友，最關鍵那句就是「大人」對佢哋班「細路」嘅無比信任，一條橋，試過15分鐘就批。
世界在變，速度好快，再等花兒也謝了。
彭瑪莉
mailto:[email protected]