海洋公園由4月14號至5月14號舉行「親親動物月」，重頭戲之一係首次推出嘅「約會海獅」，遊客可以親手觸摸加州海獅同合照。護理員會帶領海獅示範日常訓練同護理工作。負責訓練海獅嘅海洋哺乳動物部高級訓練員林浩凱話，到時14歲嘅Juju和8歲嘅Tooske會同遊客零距離接觸，「佢哋比較八卦」，遊客必須聽指示，千祈唔好自行摸海獅或者大叫。呢場30分鐘嘅約會全日得一場同只限8人，活動要額外畀錢，二人同行要298元。遊客需要喺園內太平洋海岸零售店預約，14號起正式接受預約。
另外，多種動物嘅護理員會喺「動物明星粉絲會」，同遊客分享照顧動物嘅的溫馨點滴，亦會帶同所照顧嘅動物同遊客近距離接觸，包括二趾樹懶、禿鷲同北極狐。環節歷時15至30分鐘，免費開放予公眾參與。
