香港區花旗傑出財經新聞獎舉辦至今已經8年，評判依然係男士居多，今年女士代表就係馮國經千金、利邦（891）副主席馮詠儀（Sabrina）。佢話肯做評判，除咗因為花旗集團香港及澳門區行長盧韋柏（Weber）盛意拳拳邀請之外，更加緊要係Sabrina睇在先生份上啊。
Sabrina丈夫林詩祺其實係花旗私人銀行、企業及投資銀行亞太區業務發展主管。Sabrina仲分享，兩年前，佢一滴汗都唔會出，同運動絕緣，家陣的起心肝，每日抽時間做運動，對小朋友身教亦有好處，教佢哋唔可以因為辛苦、唔鍾意就放棄，仲搞笑咁話「我𠵱家都唔鍾意做運動，但都要做㗎！」佢上個月仲贏咗UNICEF 3公里領袖挑戰賽女子組冠軍㖭。
呢種教導法，聽聞美國前第一夫人米歇爾都用，兩位第一女兒都要學一種佢哋唔鍾意嘅運動，學習自己唔喜歡都要努力克服困難、做到最好，睇嚟Sabrina同Michelle都有一樣理念。