關於馬德里體育會前鋒基沙文嘅轉會傳聞，繼續滿天飛！噚日先報道過，基沙文嘅經理人團隊透露曼聯、曼城、車路士、巴塞隆拿同皇家馬德里先後查詢過收購呢位法國射手嘅可能性，但法國《隊報》引述基沙文本人嘅一番話，就惹來各大傳媒無限遐想！
被問及由馬體會加盟同市宿敵皇馬嘅可能性，基沙文表示：「我唔可以講yes定no，你永遠唔會知道足球有咩可能，但由馬體會加盟皇馬，我唔知道呢件事有幾可行，好少好少球員試過咁做，所以我諗冇可能。」的確，近年來直接由「床單軍團」轉飯鑊上「艦」嘅例子，可能要數到2000年轉會嘅阿根廷球員蘇拿利……佢又補充話自己喺馬體會其實好開心，高興豪門招手之餘亦唔一定離隊架。唔去皇馬？有英國傳媒就擅自「超譯」，話咁樣即係代表去曼聯嘅機會大增喎，一於讓子彈再飛一會。