【劉鑾雄講大劉】
【連載系列之十三 健康要緊】劉鑾雄身為超級富豪，不時有人想向他攞着數，今回大劉接受本報專訪時，便講到早前接受換腎手術期間，遇到的光怪陸離事。大劉說：「嗰次換腎，竟然有人同我講，你死咗啲錢都帶唔走，叫我捐7,800萬加拿大紙（約4.5億港元），去加拿大一間佛堂。我心諗，第一，我有仔女；第二，我喺香港都好多善事可以做啦，但竟然叫我捐7,800萬加拿大紙，你聽見好唔好笑？」
匯錢謝好友
原來當日更有人日日在大劉公司及灣仔福臨門等他，為的是求職及應徵做「傍友」。大劉說：「不知幾多人寫信嚟，或者阿媽帶埋個女嚟，想我去照顧佢個女喎！」說罷他作一個「冇你咁好氣」表情，然後說：「望都唔敢望，聽都唔想聽，莫講唔敢有貪念，有都唔夠膽，點知你係咪捉黃腳雞㗎！」
大劉坦言接受換腎手術前命懸一線，差兩天不做，生命便有危險，那段時間，他安排了後事：「覺得身邊有邊啲人要照顧，咁就盡量做啦。」於是，他分別匯了數百萬美元給美國兩位曾經照顧過自己的好友，「我同我老婆（甘比）講，話就算我唔喺度，有邊啲人搵你幫手，你都要幫。」包括大劉發迹前一起開廠的拍檔，大劉說：「佢曾周轉過兩、三次嘅錢幫手出糧，唔係捱過嗰兩、三次，可能間廠已經執咗笠。」
陪家人重要
手術後的大劉表示現時會以健康及家人為重：「我𠵱家用多啲時間陪屋企人，多過我去搵錢。因為無論我搵多幾多，或者我搵少幾多，我都唔會使得到㗎喇。」現時他每日最少抽一次血，監察身體狀況，在家亦會有傭人24小時看護。
採訪：陳月媚
【Timeline】手機用戶請按此，瀏覽「傳奇狙擊手劉鑾雄 」: http://bit.ly/LAU-timeline
【話你知】同大劉有關係嘅名人、美女有幾多? 即睇「大劉人物關係圖 」: http://bit.ly/JosephLau