早前民主黨發現，好多美容院收入來源來自過期套票，其中經營Dr. Reborn嘅醫思醫療（2138）嘅過期套票金額佔總收入4成㖭。公司首席執行官鄧志輝噚日出席活動時就早有準備，有晒講稿，解釋話有7日合約冷靜期畀客戶諗真啲，又話根據3月份數據，有94%客戶完成療程後，即時book定未來120日嘅療程。
睇番中期報告，集團話有逾9成客都會喺完成療程後，即刻約下一次療程時間，咁既然預約人數保持高水平，點解仲會有咁多過期套票? 鄧志輝就冇正面解釋，但就話見到就算客戶有過期套票，之後都會繼續幫襯，證明對集團有信心喎。
其實鄧志輝噚日係帶傳媒去睇佢哋位於朗豪坊嘅1.8萬呎新開舖面，裏面有個大電視播放代言人溫碧霞嘅「用家心得」。鄧志輝話，今年會繼續用溫碧霞同阿嬌做代言人，公司新開設男士專區，唔排除搵多位香港男士做代言人。