從博物館飛到現實，一架曾經參與二戰作臨時轟炸機、機齡達77年嘅道格拉斯（Douglas）DC-3雙槳機，經多位航空發燒友修復後，「咔嗒」雙槳引擎聲再度響徹多個航空展，並喺上月展開環球之旅，4月23日會飛抵澳門同航空發燒友見面。
DC-3由美國道格拉斯公司設計，1935年首度試飛，翌年投產，二戰爆發後被美軍徵召，軍用版改稱C-47，另有C-49、C-53等型號，負責運送士兵及物資；由於堅固外殼可承受機槍射擊，被譽為航空史上最具代表性運輸機之一。
呢次展開環球之旅嘅DC-3編號2204，1940年3月9日完成首航，3日後交付美國航空公司。二戰期間、1942至1944年期間加入美國空軍，負責盟軍後勤支援，退役後喺多家北美航空公司服務，其後因機件老化退下火線，2008年喺瑞士錶廠百年靈贊助下由幾位航空發燒友成功復修。