立法會宣誓案，青年新政梁頌恆同游蕙禎雖然上訴到終審法院，各大政黨政團卻已磨刀霍霍，準備派人出戰新東同九西嘅補選。上屆立法會選舉，民協全軍盡墨，連橋頭堡九西都失守，今次有機會收復失地，難怪都想派人出選，據知曾出戰超級區議會、29歲何啟明同戰意幾十年如一日、64歲馮檢基，都有意代黨披甲。
八方打探過，民協最快本月尾有初選，而初選機制都喺黨內議論紛紛，認為唔應該單睇民調決定出戰人選，而係要全方面比較二人優劣。點解呢？因為如果用民調，從政多年嘅阿基就有絕對優勢，但民協內部卻有強烈聲音要求換新血喎！
之不過咁，補選係單議席單票制，同一陣營派出越多名單就越唔着數，因為只會分散票源。聽講負責協調嘅民主動力仲未就補選起動，民主黨、公民黨、自決派等都蠢蠢欲動，民協就算搞得掂內部初選，都仲要同民主派拗手瓜先至得。