北韓球員唔只淨係得鄭大世，𠵱家仲有一個韓光宋。卡利亞里周日喺意甲主場以2:3輸畀拖連奴，18歲北韓前鋒韓光宋後備上陣臨完場前頂破英格蘭首席門將赫特嘅十指關，成為首個喺意甲入波嘅北韓人。除咗韓光宋威水，主場4:0大炒巴勒莫嘅AC米蘭，陣中一班後生仔亦厲害，包括入波嘅蘇索、柏沙歷、迪路菲奧同送上助攻嘅卡拿比亞等，全部唔過23歲。