滿以為皇家馬德里喺較早時段嘅打吡戰失分，巴塞隆拿係時候把握機會重返榜首，點知佢哋喺周六西甲作客護級球隊馬拉加竟然淨吞兩蛋，兼且有巴西前鋒尼馬領紅牌，仲因為步入球員通道時懷疑拍掌諷刺第4球證隨時有手尾跟，月尾作客皇馬嘅「國家打吡」分分鐘冇佢份！
巴塞雖然周二要作客祖雲達斯踢歐聯8強首回合，前線依然出盡「MSN」，只係收起恩尼斯達，但佢哋32分鐘就有守將馬菲奧包晒越位，俾倒戈嘅馬拉加前鋒辛度拉美利斯單刀射入開紀錄。講番尼馬，呢場波上半場喺人哋開罰球前面綁鞋帶，結果球證覺得佢有心拖延時間先罰黃牌，到咗65分鐘，尼馬喺對方守將迪亞高洛蘭迪包波後依然兜腳踢落去，雖然動作唔算凶狠，但球證毫不猶豫出示紅牌，令尼馬攞到為巴塞上陣181場第一張紅牌！雖然馬拉加其後有入波被誤判越位，但祖尼喺補時反擊得手，幫馬拉加鎖定2:0勝局，取得護級救命3分，反觀巴塞輸波後31戰69分繼續排第二，落後少踢一場嘅皇馬3分。